Wavy BB 週記：兩歲半（1）正式 Potty Training

本來諗住每個禮拜長話短說，點知揀吓揀吓都有十幾張相

噢！睇嚟下個星期都係要分幾日整㗎喇！

2 歲 6 個月

估唔到 Wavy BB 兩歲半就見紅！

好似係第一次留鼻血，好在係眼見咁多就咁多啫

另一件天大嘅喜訊就係：終於搵咗屋苑啲人整好個冷氣機喇！！！

咁當然要多謝倉生開恩，批准可以開冷氣啦！

基本上日日都過 35 度，室內氣溫最少都 28，熱熱熱

今個禮拜不可不提嘅，當然係美國國慶啦！

Delano 依度，7 月 2 號晚就放煙花喇～

倉生本來話出去睇，後尾就冇咗件事！

但係夜晚 9 點幾突然 Bang Bang Bang 喎‧‧‧

所以就嗱嗱聲著好鞋出門口湊熱鬧喇喂

細 town 有細 town 仔好，行出門口就可以睇煙火

July 4th 夏日炎炎，我哋都有出街街！

行咗去 Home Depot 同 Walmart

Wavy BB 作為 ABC，當然要紅白藍咁出街啦，哈哈～

依家啲小朋友日理萬機，手提電話都要隨身攜帶呢

保守估計都有三部，仲未計佢「想像」出嚟嗰啲喎，哈！

喺 Home Depot， Wavy BB 一見到以上產品，就係咁話係

Octopus Octopus Octopus（八爪魚），哈哈！

行完 Walmart，我哋就返屋企，兩點幾都未食晏呀！

（FYI：一程起碼要行 35-45 分鐘！是日亦發生不愉快事件）

兩歲半，大個女！要學吓淋花淋草，愛護植物，嘻～

自小，Wavy BB 就對依個大笨象淋水器「虎視眈眈」㗎喇

倉生之前喺網上買咗 set

LEGO The Simpsons mini figures

Wavy 當然爭住砌，基本上都砌得有辦有眼

係將啲 accessories 擺上手難少少

最正梗係依個「金魚缸意外」

一套 16 款

＜多謝爸爸！＞

依個 long weekend，媽媽仲拎咗啲 paint chips

揀呀揀，畫呀畫，剪吓剪，貼呀貼

Ta-da：Wavy BB 暫時嘅最愛 - Peppa Pig（粉紅豬小妹）

媽媽只係整咗 Teddy、Peppa Pig、George、Dinosaur 同 Mami Pig

今週之最，當然係 Potty Training 啦！！！

其實 5 月已經偶然 train 過一次，兩三日都幾 OK

有一日仲連中三元添呀，但係我哋週末成日上上落落

好難維持，吓吓坐車都幾個鐘，一次意外都唔知點算呀！

好在依幾日係長假期，又唔出去

依幾日 OK 呀，第一日有兩三次意外

第二日冇意外（因為睇得佢好實？哈哈）

第三日都係兩三次意外，第四日就一兩次咁

Wavy BB 應該都幾掌握得到，起碼冇提都識去！

每週愛心玩意

希望每個禮拜都可以用有限嘅資源

做啲愛心小手工比 Wavy BB 呢

今個星期當然係 Peppa Pig

媽媽冒住比人話嘅情況

趕快畫、剪、貼㗎